VAR hefur 48 sinnum gripið inn í á þessari leiktíð og sex sinnum hafa mistök verið gerð.

ESPN hefur sagt frá því að ein þessara mistaka sé mark sem Gabriel Martinelli skoraði gegn Manchester United.

Arsenal skoraði á tólftu mínútu á Old Trafford en markið var dæmt af eftir VAR-skoðun. Það var metið sem svo að Martin Ödegaard hefði brotið á Christian Eriksen í aðdragandanum. Markið hefði í raun átt að standa.

Staðan var markalaus þegar markið kom en United skoraði í kjölfarið mark sem var metið löglegt. United vann að lokum 3-1 sigur.

Vonast er eftir færri mistökum á seinni hluta tímabilsins en þetta sýnir fram á það að myndbandsdómgæsla bjargar ekki öllu.