„Sepp Maier sagði einu sinni að það væri ekkert óverjandi og maður ætti alltaf að vera þar sem boltinn kæmi. Það væri kjánalegt hjá mér að segja að hann ætti að gera eitthvað betur," sagði markmannsþjálfarinn Guðmundur Hreiðarsson við Fótbolta.net í dag aðspurður út í mörkin sem Hannes Þór Halldórsson fékk á sig gegn Nígeríu í gær.
Ahmed Musa, framherji Leicester, skoraði bæði mörk Nígeríu í síðari hálfleiknum.
„Hann var nálægt því að verja fyrsta markið. Höndin hefði getað verið aðeins ofar eða aðeins utar. Hann er nálægt og gerir sig eins breiðan og hann getur. Það er erfitt að setja eitthvað út á það."
„Í seinna markinu hefði hann mögulega getað farið fyrr út en þá hefði hann líka getað litið mjög illa út og verið kominn í einskins manns land. Ég ætla ekki að nudda honum upp úr þessum tveimur mörkum. Það er alveg klárt."
Guðmundur hefur verið ánægður með Hannes í leikjunum hingað til.
„Ég er mjög ánægður með frammistöðu hans og hugarfar. Ég er rosalega ánægður með alla markmennina á mótinu hingað til. Þeir hafa lagt sig gríðarlega vel fram og stutt vel við hvorn annan. Þeir hafa allir bætt sig og eru í rosalega góðu standi. Ég er ánægður með Hannes og ég er ánægður með hina tvo."
Hér að ofan má sjá viðtalið í heild.
Sjá einnig:
Gummi Hreiðars þurfti að öskra til að fá VAR vítið
Athugasemdir