Íslenska landsliðið fékk vítaspyrnu í leiknum gegn Nígeríu í gær eftir að myndbandsdómgæsla, VAR, var notuð. Nokkur VAR víti hafa verið dæmd á HM en í gær braut Tyronne Ebuehi á Alfreð Finnbogasyni og dæmd var vítaspyrna eftir talsverða reikistefnu.
Leikurinn hélt fyrst áfram áður en Matthew Conger, dómari frá Nýja-Sjálandi, ákvað að beita VAR tækninni. Atvikið var skoðað á myndbandinu og vítaspyrna dæmd í kjölfarið.
Freyr öskraði í eyrað á Gumma
Guðmundur Hreiðarsson, markmannsþjálfari íslenska landsliðsins, er í beinu sambandi við Frey Alexandersson á meðan á leik stendur en Freyr situr ofar í stúkunni þar sem hann er meðal annars með sjónvarsskjá.
Dómarateymi gærdagsins ákvað að beita VAR dómgæslunni eftir að Guðmundur lét í sér heyra við fjórða dómara leiksins.
„Freyr var uppi í stúku og sendi mynd niður. Þetta var klárt brot við fyrstu sýn," sagði Guðmundur við Fótbolta.net í dag.
„Freyr öskraði í eyrað á mér að þetta væri klárt brot og þá fór ég til aðstoðardómarans og öskraði að þetta væri klárt brot. Hann sagði að það væri dómarans að ákveða það en ég sagði við að hann að hann yrði að láta vita því þetta var klárt brot í sjónvarpinu. Niðurstaðan var sú að hann fór og skoðaði þetta aftur og þá settist ég rólega niður því ég vissi að þetta væri víti."
„Ef við hefðum ekki sagt neitt, hefði hann þá ekki dæmt neitt?"
VAR hefur verið talsvert til umræðu á HM og sitt sýnist hverjum um þessa nýju tækni.
„Í þessum leikjum sem ég hef verið að fylgjast með og VAR hefur komið við sögu þá finnst mér menn hafa þurft að sækja þetta. Svíarnir voru komnir í varnarleik og voru ennþá að tuða þegar dómarinn ákveður þetta. Mér finnst að þetta eigi ekki að vera svona."
„Ef við mótmælum ekki, fáum við þá ekki neitt? Ef við mótmælum þá er þetta hugsanlega skoðað. Mér fannst við þurfa að sækja þetta víti í gær. Leikmenn gerðu það líka inni á vellinum, þeir voru utan í dómaranum. Kannski kveiktum við bál þannig að allir byrjuðu að tala saman og segja við að hann að þetta væri víti.
Ef við hefðum ekki sagt neitt, hefði hann þá ekki dæmt neitt?"
Hér að ofan má sjá Guðmund fara yfir atburðarásina í gær.
Athugasemdir