Óhætt er að segja það að Karius hafi verið í sviðsljósinu síðustu mánuði en hann átti ævintýralega slakan leik gegn Real Madrid í úrslitum Meistaradeildar Evrópu.

Hann gaf fyrst Karim Benzema mark á silfurfati áður en hann misreiknaði fast skot Gareth Bale og 3:1 sigur Madrídinga staðreynd í úrslitum.

Þegar undirbúningstímabilið hófst þá héldu vandræðin áfram en hann missti boltann í upphitun fyrir fyrsta leik gegn Chester og þá fékk hann einnig gusuna yfir sig eftir leikinn gegn Tranmere Rovers.

Sjálfstraustið hefur verið í molum hjá kappanum og átti hann aftur slakan leik í gær er Liverpool tapaði 3:1 fyrir Dortmund. Liverpool er þegar búið að staðfesta kaup á Alisson Becker frá Roma en hann er dýrasti markvörður heims og morgunljóst að Karius verður annar kostur.

Karius birti mynd á Instagram í gær þar sem hann ræddi um gagnrýnina og nú hefur Mohamed Salah, einn besti leikmaður Liverpool, komið honum til varnar og sýnt honum stuðning.

„Vertu sterkur, Karius. Þetta hefur gerst fyrir marga af bestu leikmönnum heims. Ekki hlusta á þá sem dreifa hatri," skrifaði Salah á Twitter.

Stay strong Karius, it has happened to the best of players. Ignore those who hate.@LorisKarius

— Mohamed Salah (@MoSalah) July 23, 2018