Gabriel Martinelli, vonarstjarna Arsenal, segir að honum líði vel og að hann sé klár í að spila aftur. Martinelli meiddist í gær í tapleiknu gegn Manchester City í bikarnum en nú er ljóst að meiðslin eru ekki alvarleg.
Martinelli spilaði sinn fyrsta leik í byrjunarliðinu síðan í mars mánuði en þessi Brasilíumaður þurfti að fara útaf í gær eftir samstuð við markvörð City.
Martinelli setti inn færslu á Instagram eftir leikinn þar sem hann skrifaði að honum líður vel og að hann sé klár í slaginn á ný.
„Hann fékk slæmt högg á legginn og það byrjaði að bólgna upp, þess vegna gat hann ekki haldið áfram. Þetta er ekkert alvarlegt," sagði Arteta eftir leikinn í gær.
„Í hálfleiknum var hann ólmur í að halda áfram að spila, þetta var ekki opið sár. En verkurinn var það mikill að eina í stöðunni var að taka hann útaf."
Arsenal mætir Chelsea í ensku úrvalsdeildinni á laugardaginn en liðið þarf nauðsynlega á sigri að halda.
Athugasemdir