Jón Þorgrímur var einu sinni valin í landsliðshóp sem mætti Brasilíu en þurfti að draga sig úr honum eftir að hafa fótbrotnað. Guðjón Þórðarson og Atli Eðvaldsson heitinn tilkynntu honum einnig að þeir væru að fylgjast með honum.

„Við unnum KR 2-1 og ég skoraði að venju á móti KR. Atli tók mig á eintal og sagði að ég væri með allt, fáránlegan hraða, ótrúlega tækni og ætti auðvelt með að taka menn á en ég yrði að vinna í skapinu mínu og ég hefði ekki nógu mikið þol. Þú ert game winner og gætir verið svona allan leikinn ef þú værir í betra standi. Ég tók hæfilega mark á þessu," segir Jón Þorgrímur í viðtalinu og benti að hann hafi verið í vinnu bæði fyrir og eftir æfingar og legði því mikið á sig til að spila í áhugamálabolta.

Í kjölfarið fóru þeir Atli nokkrum sinnum út að borða og á kaffihús því Atli og ætlaði sér að hjálpa honum að komast í stand til að spila með íslenska landsliðinu.

„Hann spyr mig 'afhverju heldurðu að þú sért ekki til í að leggja þetta á þig?' Ég sagði honum að ég væri að vinna í að byggja upp annars konar feril í heimi viðskipta frekar en heimi fótboltans. Lýsti því hvað ég væri að gera og hvaða fyrirtæki ég væri með þá," sagði Jón Þorgrímur.

„Þá kom hann með þessa setningu að ég ljómaði þegar ég talaði um þetta en það væri ekki sami ljóminn yfir mér þegar ég talaði um fótbolta. Hann sagði við mig að ég ætti að átta mig á því að ég væri einn af þeim heppnu sem væri að vinna við það sem ég hefði ástríðu fyrir. Það væri bara frábært. Mér fannst gott að heyra þetta á sínum tíma."

Jón Þorgrímur segir svo frá því í viðtalinu að eftir þetta hafi Atli aldrei rætt við hann um fótbolta heldur bara spurt hvað væri að gerast í fyrirtækinu hans. „Á sama tíma drap ég alla möguleika á að spila landsleik en ef maður ætlar að ná árangri í fótbolta þá þarf hugurinn að vera 100% þar," sagði hann.

í spilaranum að neðan má heyra viðtalið í heild sinni en Jón Þorgrímur heldur þar áfram og segir hvernig fótboltaferillinn hefur hjálpað honum í viðskiptum.