Slagurinn um Manchester fór fram fyrr í kvöld á Old Trafford og var staðan markalaus eftir nokkuð jafnan fyrri hálfleik.

Gæðamunur liðanna var þó augljós og gerði Bernardo Silva fyrsta mark leiksins skömmu eftir leikhlé. Markið skoraði hann eftir að hafa fengið of mikið pláss við vítateigslínuna, Luke Shaw réði ekki við hann einn síns liðs og fékk ekki aðstoð.

Leroy Sane kom inn fyrir Fernandinho sem hafði farið útaf meiddur og tvöfaldaði forystu Man City eftir frábæran undirbúning frá Raheem Sterling. Sane skaut föstu skoti beint á David de Gea sem varði boltann í netið.

Jesse Lingard klúðraði dauðafæri fyrir Man Utd og fengu bæði lið færi til að bæta mörkum við en inn fór boltinn ekki. Verðskuldaður sigur Man City sem endurheimtir toppsæti ensku úrvalsdeidlarinnar af Liverpool.

Man Utd er sem fyrr í sjötta sæti, þremur stigum frá Chelsea í Meistaradeildarsæti.