Sergio Agüero skoraði tvö í stórsigri Manchester City gegn Everton í lokaumferð ensku úrvalsdeildarinnar.
Argentínski sóknarmaðurinn hefur þá líklega spilað sinn síðasta úrvalsdeildarleik en hann verður samningslaus í sumar og er líklegast á leið til Barcelona. Svo segir þjálfari hans Pep Guardiola.
„Ég er kannski að uppljóstra leyndarmáli, en hann er kannski nálægt því að semja við félagið sem á hjarta mitt - Barcelona," sagði Guardiola.
„Þar mun hann spila með besta leikmanni allra tíma, Messi. Ég er viss um að hann muni njóta sín þar og að liðið verði sterkara með hann á vellinum."
Agüero, sem verður 33 ára í byrjun júní, hefur skorað 260 mörk í 389 leikjum fyrir Man City. Síðasti keppnisleikur hans fyrir félagið verður úrslitaleikur Meistaradeildarinnar næsta laugardag.
Athugasemdir