Ísak Bergmann Jóhannesson spilaði allan leikinn þegar Norrköping tapaði gegn Elfsborg í sænsku úrvalsdeildinni.
Hinn danski Jeppe Okkels skoraði fyrsta mark leiksins þegar fimm mínútur voru eftir í fyrri hálfleiks. Það reyndist bara eina mark leiksins, lokatölur 1-0 fyrir Elfsborg.
Ísak var eini Íslendingurinn í hóp hjá Norrköping í dag. Ari Freyr Skúlason er meiddur og sömu sögu er að segja af Oliver Stefánssyni. Jóhannes Kristinn Bjarnason er einnig á mála hjá félaginu en hann er aðeins 16 ára.
Norrköping er með 11 stig eftir átta leiki í sjötta sæti sænsku úrvalsdeildarinnar. Liðið hefur tapað tveimur leikjum í röð og er núna níu stigum frá toppnum.
Samkvæmt vefsíðunni Flashscore þá spilaði Ísak á miðsvæðinu í leiknum í dag. Ísak er í íslenska landsliðshópnum sem spilar vináttulandsleiki í næsta mánuði.
Molde vann toppslaginn í Noregi
Hólmar Örn Eyjólfsson var ekki með Rosenborg í toppbaráttuslag í Noregi í kvöld. Hann fór í aðgerð á nára síðastliðinn föstudag og er frá í tvær vikur. Án hans í liðinu tapaði Rosenborg 2-3 gegn Molde. Molde kom sér á toppinn með sigrinum.
Athugasemdir