Maurizio Sarri er ósáttur með reglurnar í ensku úrvalsdeildinni sem gefa liðum sem spila í Evrópudeildinni minni sveigjanleika en annars staðar.
Chelsea og Arsenal unnu sína leiki í Evrópudeildinni á fimmtudagskvöldið og mættu svo bæði til leiks í ensku úrvalsdeildinni á sunnudaginn.
Chelsea fór til Grikklands og lagði PAOK að velli með einu marki gegn engu en gerði svo markalaust jafntefli við West Ham og tapaði þannig sínum fyrstu stigum á tímabilinu. Leikmenn Chelsea fengu því aðeins einn heilan dag í hvíld á milli leikja, en flogið var heim frá Grikklandi á föstudeginum.
„Þetta er ekki mikið vandamál núna en það verður verra í mars og apríl. Ég skil ekki hvers vegna það má ekki biðja um að fá að spila á mánudögum í enska boltanum. Á Ítalíu og víðar er það eðlilegt," sagði Sarri eftir jafnteflið.
„Við þurftum að vera sneggri að færa boltann gegn West Ham, en það er erfitt þegar menn eru þreyttir."
Athugasemdir