Gael Givet, fyrrum varnarmaður Blackburn, segir að knattspyrnustjórinn Sam Allardyce, eða Stóri Sam eins og hann er stundum kallaður, hafi sýnt leikmönnum sínum brot úr kvikmyndunum Gladiator og 300 fyrir 7-1 tap gegn Manchester United.
Stóri Sam sannfærði Givet um að yfirgefa Marseille og koma til Blackburn í janúar 2009. Hann var hjá Blackburn í fjögur og hálft ár eftir það.
Frakkinn segir að Allardyce hafi notað furðulegar aðferðir til að hvetja liðið áfram, enga furðulegra en sá sem hann notaði fyrir leik á Old Trafford.
„Við höfðum hitað upp og fórum aftur inn í klefa," sagði Givet við franska íþróttablaðið L'Equipe.
„Þegar við vorum að setja á okkur legghlífarnar, þá sagði hann: 'Strákar, bíðið'. Hann kom með myndvarpa og sýndi okkur samantekt úr myndunum Gladiator og 300. Í stuttu máli sagt, hermenn með sverð."
„Við vorum allir í búningsklefanum og sögðum: 'Ahhhh!' (sagði hann og hermdi eftir hermenni með sverð)."
„Eftir 30 mínútur vorum við 3-0 undir. Við töpuðum 7-1. Eftir leikinn þá hlógum við allir."
Þann dag skoraði Dimitar Berbatov fimm mörk, en Nani og Park Ji-sung skoruðu einnig. Christopher Samba skoraði fyrir Blackburn þegar 70 mínútur voru eftir.
Allardyce, sem er án félags í dag, var rekinn frá Blackburn þremur vikum síðar.
Athugasemdir