Sara Björk er búin að eiga magnað ár.
Það er aðfangadagur og það eru sjö dagar eftir af þessu ári.
Þetta ár er búið að vera mjög eftirminnilegt, og ekki af sérlega góðum ástæðum.
Fótboltaárið er búið að vera fordæmalaust; mikið stopp og oftast engir áhorfendur. Fótboltatímabilið á Íslandi var ekki klárað, EM var frestað fram á næsta ár og í stærstu deildum Evrópu var spilað langt fram á sumar.
Það er samt sem áður mikið minnistætt búið að gerast, sumt gott og sumt ekki. Hér að neðan má skoða lista yfir það tíu minnistæðasta frá árinu að mati fréttamanns Fótbolta.net. Á listanum er einungis átt við það sem gerðist inn á fótboltavellinum eða tengist einhverju sem gerðist inn á fótboltavellinum.
Listinn er ekki í neinni sérstakri röð.
Nálægt því að komast á listann:
- Stór töp Liverpool og Man Utd
- Sigur Íslands á Rúmeníu
- Frábær frammistaða gegn Svíþjóð á Laugardalsvelli
- Hiti í leik KR og Víkings á Meistaravöllum
- Tindastóll upp í Pepsi Max-deild kvenna í fyrsta sinn
Liverpool meistari - Liverpool vann sinn fyrsta Englandsmeistaratitil í 30 ár. Jordan Henderson lyfti bikarnum á tómum Anfield.
Skelfilegur endir í Ungverjalandi - Ísland komst ekki á EM eftir dramatískt tap gegn Ungverjalandi í úrslitaleik. Ungverjar jöfnuðu á 88. mínútu og Dominik Szoboszlai skoraði sigurmarkið með langskoti í uppbótartíma. Ekki góð minning.
Sigur U21 á Írlandi - U21 landsliðið vann frábæran útisigur á Írlandi þar sem Valdimar Þór Ingimundarson skoraði sigurmarkið á 93. mínútu. Þessi sigur tryggði liðinu farseðilinn í lokakeppni Evrópumótsins.
Sigurmark Berglindar - Berglind Björg Þorvaldsdóttir skoraði sigurmark Íslands gegn Ungverjalandi í lokaleik liðsins í undankeppni EM. Markið skoraði hún með skoti fyrir utan teig. Frábært mark sem tryggði Íslandi farseðil á EM.
Fyrsti landsleikur Ísaks - Hinn 17 ára gamli Ísak Bergmann Jóhannesson átti stórkostlegt ár þar sem hann var orðaður við hvert risa félagið á fætur öðru. Í nóvember spilaði hann sinn fyrsta A-landsleik þegar hann kom inn á sem varamaður gegn Englandi. Landsleikirnir eiga eftir að verða fleiri í framtíðinni.
Sara annar Íslendingurinn til að vinna Meistaradeildina - Sara Björk Gunnarsdóttir varð síðasta sumar annar Íslendingurinn til að vinna Meistaradeildina. Hún var frábær í úrslitaleiknum gegn sínum gamla félagi, Wolfsburg, og skoraði þriðja markið í 3-1 sigri.
Innkoma Bruno Fernandes - Fernandes var keyptur til Manchester United í byrjun árs og hann er búinn að breyta miklu fyrir liðið með frammistöðu sinni. Verið algjörlega magnaður. Hann setti strax tóninn með frábæru hugarfari, mörkum og stoðsendingum.
Sýning Skagamanna á Hlíðarenda - ÍA vann mjög óvæntan 4-1 sigur á Valsmönnum snemma í júlí. Það var vendipunktur fyrir Val því liðið tapaði ekki leik eftir það og endaði sem Íslandsmeistari.
Breiðablik fór illa með keppinauta sína Tvö bestu lið Pepsi Max-deildar kvenna mættust 21. júlí. Búist var við spennandi leik, en svo varð ekki. Breiðablik vann Val 4-0, og Valur náði aldrei Blikum í mótinu eftir það.
Risatap Barcelona - Barcelona tapaði 8-2 fyrir Bayern München í ótrúlegum leik í Meistaradeildinni síðasta sumar. Eftir það bað Lionel Messi um að fá að fara frá félaginu, en hann fékk ekki ósk sína uppfyllta.
Athugasemdir
