Alfreð í baráttunni gegn Andorra á föstudaginn. Hans næsta verkefni er að ógna vörn heimsmeistara Frakka á sjálfum Stade de France. Hann segir að það verði snúið.
„Þetta verður mjög snúinn leikur," sagði Alfreð Finnbogason framherji íslenska landsliðsins við Fótbolta.net.
Ísland er að fara að mæta heimsmeisturum Frakka í undankeppni EM 2020 í kvöld en leikið verður á Stade de France, þjóðarleikvangi Frakka í París.
„Þeir verða meira með boltann, við þekkjum að spila á móti þeim, gerðum það fyrir nokkrum mánuðum og það gekk mjög vel," hélt Alfreð áfram og vísaði þar í 2-2 jafntefli við Frakka í æfingaleik í Guincamp í október.
Ísland hóf keppni í undankeppninni í Andorra á föstudaginn og vann þá 0-2 sigur á heimamönnum. Alfreð segir þann leik ekki hafa tekið of mikla orku frá okkur þó stutt sé milli leikja.
„Eftir að við komumst í 2-0 á móti Andorra náðum við að spara orkuna, halda boltanum og láta þá hlaupa. Það fór því ekki of mikil orka í þann leik. Við verðum því klárlega ferskir gegn Frökkunum," sagði hann að lokum.
Athugasemdir
