Stefnt er á að hefja leik í K-deildinni í Suður-Kóreu, úrvalsdeildinni þar í landi, þann 8. maí næstkomandi.
Ýmsar takmarkanir verða á leikjum í deildinni. Engin handabönd verða fyrir leik, leikmenn mega ekki tala saman og þjálfarar verða að vera með grímu á hliðarlínunni. Þetta kemur fram á Daily Mail.
Deildin átti að hefjast í febrúar, en það var ekki hægt vegna kórónuveirunnar. Nýlega hafa lið byrjað að æfa aftur og spila æfingaleiki.
Kim Do-hyeok, fyrirliði Incheon United, segir að það verði erfitt að spila við þær takmarkanir sem settar hafa verið á. „Að tala ekki við liðsfélagana í leiknum er ómögulegt. Ef við getum ekki talað saman á vellinum þá getum við alveg eins sleppt því að spila."
Það hafa komið upp meira en 10,700 kórónuveirusmit í Suður-Kóreu og hafa 240 látist vegna veirunnar í landinu.
Það verður auðvitað leikið fyrir luktum dyrum til að byrja með í úrvalsdeildinni í Suður-Kóreu.
Athugasemdir