Færeyska knattspyrnusambandið hefur tilkynnt landsliðshópinn sem mætir Íslandi þann 4. júní í vináttulandsleik í Þórshöfn.

Einn leikmaður úr Pepsi Max-deildinni er í hópnum en það er Kaj Leo í Bartalsstovu, leikmaður Vals. Kaj Leo var ekki valinn í leiki Færeyja í undankeppni EM fyrr á þessu ári en fær nú kallið á ný.

Gunnar Nielsen, markvörður FH, er ekki í hópnum. Sagt er að hann hafi ekki gefið kost á sér af persónulegum ástæðum en einnig er umræða um að landsliðsþjálfarinn hafi viljað skoða Teit Gestsson, markvörð Færeyjameistara HB, betur í þessu verkefni.

Rene Joensen, Sonni Ragnar Nattestad og Brandur Olsen eru í hópnum en þeir léku allir í íslensku deildinni.