Heimir Hallgrímsson.
Blaðamaður Guardian spurði að því á fréttamannafundi í dag af hverju Íslendingar séu alltaf svona bjartsýnir. Ísland þarf sigur gegn Króatíu í Rostov á morgun til að eiga séns á að fara áfram í 16-liða úrslit.
Trúin í hópnum er góð og leikmenn eru staðráðnir í að ná sigri gegn Króatíu á morgun. Blaðamaðurinn spurði út í bjartsýnina í íslenska hópnum.
„Þetta er í genunum. Við höldum alltaf að við vinnum Eurovision en förum aldrei í úrslit þar," sagði Heimir léttur í bragði.
„Það er sama hér. Við höldum að vinnum alla leiki og þó við töpum þá höldum við að við vinnum næsta leik. Það er í genunum að vera jákvæðir."
Ísland mætir Króatíu klukkan 18:00 annað kvöld í Rostov við Don en einungis sigur dugir til að eiga möguleika á sæti í 16-liða úrslitum.
Athugasemdir
