Tveir leikir fóru fram í spænsku La Liga í kvöld. Betis tók á móti botnliði Espanyol og Eibar fékk Valencia í heimsókn í leik þar sem Valencia gat komið sér upp í Evrópusæti.

Í Sevilla, á heimavelli Betis, voru það heimamenn sem skoruðu eina mark leiksins. Marc Bartra skoraði það með skalla eftir hornspyrnu Sergio Canales í upphafi seinni hálfleiks. Sigurinn lyftir Betis upp um eitt sæti en Espanyol er átta stigum frá öruggu sæti þegar sjö umferðir eru eftir.

Í Eibar náðu heimamenn forystunni á 16. mínútu þegar Geoffrey Kondogbia varð fyrir því óláni að skora sjálfsmark. Kondogbia var að reyna hreinsa frá marki en tilraun hans mislukkaðist.

Mörkin urðu ekki fleiri en undir lok leiksins fékk Eliaquim Mangala að líta sitt annað gula spjald hjá gestunum og þar með rautt. Eibar fjarlægist fallsætin en liðið er nú sex stigum fyrir ofan 18. sætið.