Vonir Real Madrid um að fá Kylian Mbappe frá Paris Saint-Germain eru litlar eftir að franska félagið ákvað að reka þýska þjálfarann Thomas Tuchel. (AS)

Atlético Madríd er að íhuga að leggja fram lánstilboð í Ainsley Maitland-Niles, leikmann Arsenal, í janúar. (Daily Mail)

Atlético er einnig að fylgjast með Marcos Alonso, leikmanni Chelsea, en Alonso hefur fengið lítinn spiltíma með enska félaginu á þessari leiktíð. (El Chiringuito)

Ole Gunnar Solskjær, knattspyrnustjóri Manchester United, vill fá miðvörð á næsta ári en það þykir ólíklegt að félagið taki þátt í kapphlaupinu um David Alaba, leikmann Bayern München. (Telegraph)

Ítalska félagið AC Milan bindur miklar vonir við að framlengja samning Hakan Calhanoglu en hann hefur verið orðaður við Manchester United undanfarnar vikur. (Goal)

Manchester City og Tottenham eru að fylgjast með hollenska miðjumanninum Marten De Roon en hann hefur spilað feykivel með ítalska liðinu Atalanta síðustu ár. (90 min)

Cenk Tosun, framherji Everton og tyrkneska landsliðsins, hefur verið orðaður við hollenska félagið Feyenoord síðustu daga en Dick Advocaat, þjálfari liðsins, neitaði þeim sögusögnum á blaðamannafundi í gær. (FC Update)

Spænska félagið Barcelona hafnar þeim sögusögnum um að félagið hafi áhuga á að fá Shkodran Mustafi frá Arsenal. (Mundo Deportivo)

Chelsea hefur skráð sig í kapphlaupið um hinn 19 ára gamla Moises Caicedo, sem er á mála hjá Independiente del Valle. Enska félagið Manchester United hefur einnig áhuga á miðjumanninum. (Daily Mail)

Ítalska félagið Napoli er reiðubúið að hlusta á tilboð í spænska miðjumanninn Fabian Ruiz eftir að samningaviðræður við leikmanninn sigldu í strand. (Calciomercato)