Goðsögnin Diego Maradona er ekki sáttur með argentíska landsliðið í fótbolta. Maradona þjálfar í dag Dorados í Mexíkó, en hann þjálfaði argentíska landsliðið frá 2008 til 2010 og var leikmaður þess frá 1977 til 1994. Hann er jafnan talinn einn besti fótboltamaður sem uppi hefur verið.
Argentína tapaði 3-1 gegn Venesúela í vináttulandsleik á föstudag. Maradona horfði ekki á leikinn.
„Nei ég horfði ekki á leikinn, ég horfi ekki á hryllingsmyndir," sagði Maradona.
„Hélt þetta óhæfa fólk sem stjórnar argentíska landsliðinu að það myndi vinna Venesúela? Það er gott lið."
„Núverandi lið Argentínu á ekki skilið að klæðast treyjunni."
Maradona gagnrýndi einnig Claudio Tapia, forseta knattspyrnusambandsins í Argentínu.
„Hann hefur ekki hugmynd um hvað hann er að gera. Ég finn til með argentísku þjóðinni sem heldur áfram að trúa á þennan lygara.
Leikurinn gegn Venesúela var endurkomuleikur Lionel Messi í argentíska landsliðið.
Argentína spilar vináttulandsleik við Marokkó í kvöld. Messi verður ekki með þar vegna meiðsla.
Athugasemdir