Forsaga málsins er sú að Lazio hunsaði sóttvarnarreglurnar á Ítalíu í tvígang. Knattspyrnusambandið hóf rannsókn gegn Lazio í nóvember eftir að nokkrir leikmenn liðsins greindust með veiruna eftir Meistaradeildarleik en fengu þó að spila í Seríu A.

Í fyrra skiptið ákvað félagið að spila leikmanni í ítölsku deildinni sem átti að vera í tíu daga sóttkví. Félaginu er skylt að tilkynna ríkinu um virkt smit í hópnum en það var gert seint og þá leyfði félagið þremur leikmönnum liðsins að æfa með liðinu þrátt fyrir að vera smitaðir.

Málið var höfðað gegn Lazio í síðasta mánuði og í dag var úrskurðað í því en Lotito, forseti Lazio, var dæmdur í sjö mánaða bann fyrir að brjóta sóttvarnarreglur og þá voru tveir læknar liðsins dæmdir í eins árs bann.

Lazio var þá sektað um 150 þúsund evrur. Ítalskir miðlar greindu frá því að knattspyrnusambandi ætlaði sér að draga stig af Lazio en það var þó ekki raunin.