Skoski miðjumaðurinn hefur brotið sér leið inn í lið United og er nú með mikilvægari leikmönnum liðsins en Jose Mourinho gaf honum tækifærið hjá United árið 2017.

McTominay gat farið á lán fyrir einu og hálfu ári síðan en hann ákvað þó að vera áfram og berjast fyrir sæti sínu.

„Það var fyrir svona einu og hálfu ári þar sem ég gat farið á lán en svo fóru einhverjir leikmenn og þá gafst tækifærið og ég ákvað að nýta það," sagði McTominay í Official United-hlaðvarpinu.

„Maður heyrir sögur af strákum sem fara á lán en ég vildi aldrei taka þann séns. Ég vildi fyrst sanna mig hér og ef það myndi ekki ganga upp þá færi ég annað."

„Maður heyrir sögur um að lifa lúxuslífi hjá Manchester United og það eru margir sem taka því sem sjálfsögðum hlut. Eins og að fá mat á æfingasvæðinu, einhver búinn að græja æfingafötin fyrir þig á hverjum morgni og menn bara búast við því en maður verður að muna hvaðan maður er og vera þakklátur fyrir það sem fólk gerir fyrir þig," sagði hann ennfremur.