Ciro Ferrara, fyrrum varnarmaður Napoli og ítalska landsliðsins, safnaði 55 þúsund evrum til styrktar baráttunni gegn kórónaveirunni á Ítalíu með því að selja notaða treyju af Diego Armando Maradona á uppboði.
Ferrara og Maradona voru liðsfélagar hjá Napoli í sjö ár frá 1984 til 1991 en Maradona er talinn einn besti knattspyrnumaður allra tíma og ljóst að notuð treyja af honum er eitthvað sem telst afar sjaldgæft að sjá á uppboði.
Treyjan fór á níu milljónir íslenskra króna og rann upphæðin óskert í baráttuna gegn kórónaveirunni á Ítalíu.
Maradona þakkaði Ferrara sérstaklega fyrir á Instagram.
„Við unnum annan leik fyrir Napoli og fólkið í Napoli. Þetta var líklega mikilvægasti leikurinn og við unnum hann saman og stóðum saman í þessu eins og við gerðum alltaf. Takk fyrir þetta Ciro því þú leyfðir mér að upplifa tilfinninguna að vera partur af Napoli," sagði Maradona.
„Ég heyrði í þessum 80 þúsund stuðningsmönnum á San Paolo og fann sömu gleði og ástríðu með þessu góðverki þínu. Þetta er ógleymanlegt. Það er minn heiður að geta styrkt þessa baráttu og hjálpað okkar fólki á þessum fordæmalausu tímum," sagði hann ennfremur.