„Mér fannst Fylkismennirnir koma grimmir inn í leikinn og gera gott mark. Virkilega vel gert hjá Kolbeini að setja boltann upp í hornið. Við svörum til baka en náum aldrei flugi í leiknum," sagði Ólafur Kristjánsson þjálfari FH eftir 2-2 jafntefli liðsins gegn Fylki í Árbænum í kvöld.
Lestu um leikinn: Fylkir 2 - 2 FH
„Þeir komast aftur yfir og við jöfnum aftur en síðan fannst mér bæði liðin vanta kraftinn og yfirvegunina til að klára þá möguleika. Þetta var ofboðslega slitið í restina og það er greinilegt að þetta leikaálag er farið að bitna á gæðunum á þess sem fram fer."
„Leikurinn var töluvert opinn í restina þegar liðin voru að reyna sækja eitthvað og púlsinn var kominn hátt og skynsemin ekki alltaf í fyrirrúmi. Pétur fékk frábært færi eftir horn og Jákup eitt annað. Síðan fengu Fylkir að sjálfsögðu sín færi líka. Ég ætla ekki að falla í þá gryfju og tala okkur upp í eitthvað meira. Það var súrt að ná ekki þessum tveimur stigum sem voru í boði en það er bara upp á hestinn og áfram gakk. Það er erfiður bikarleikur gegn heitasta liði landsins, mjög góða Skagamenn á fimmtudaginn og við þurfum að sýna betri frammistöðu gegn þeim."
Ólafur Kristjánsson segir að skoða þurfi leikjadagskránna á Íslandsmótinu.
„Leikjaálagið er mikið og þetta er helvíti flott á Excel-skjali að spila svona marga leiki en þetta er farið að bitna á gæðunum. Þetta er algjörlega galið. Þú ert 72 klukkutíma að recovera eftir leik og ef þú kíkir á það hvernig við höfum spilað frá lok apríl til byrjun júní þá höfum við spila níu leiki. Það er ofboðslega erfitt að bjóða leikmönnum upp á það. Tökum það síðan inn í reikninginn að fram að Íslandsmótinu þá spilum við ekki keppnisleiki. Ég er ekki að afsaka eitt né neitt í frammistöðu en maður sér það bara á leikjunum sem við höfum verið að spila í þessum umferðum að leikmenn eru gjörsamlega komnir á fótum fram."
Gary Martin fyrrum leikmaður Vals er án félags. Hefur Óli áhuga að fá hann?
„Er ekki best að segja að allir möguleikar eru skoðaðir í þessu. Við erum ánægðir með hópinn og höfum ekkert verið að blanda okkur í mál Gary Martin. Hann er líflegur karakter," sagði Ólafur Kristjánsson að lokum.
Athugasemdir