Topplið Juventus mætti fallbaráttuliði Lecce í eina leik kvöldsins í ítalska boltanum.

Staðan var markalaus eftir fyrri hálfleik sem einkenndist af mikilli baráttu en Fabio Lucioni leikmaður Lecce fékk að líta rauða spjaldið eftir rétt rúmlega hálftímaleik. Lucioni gerðist sekur um klaufaleg mistök og braut af sér sem aftasti varnarmaður.

Í seinni hálfleik skoraði Paulo Dybala fallegt mark utan teigs eftir sendingu frá Cristiano Ronaldo og tvöfaldaði Ronaldo forystuna með marki úr vítaspyrnu níu mínútum síðar.

Tíu leikmenn Lecce reyndu að svara fyrir sig en Gonzalo Higuain gerði þriðja mark Juve eftir frábæra hælsendingu frá Ronaldo. Tveimur mínútum síðar skoraði Matthjis De Ligt með skalla eftir fyrirgjöf Douglas Costa.

Juve er með sjö stiga forystu á toppinum en Lazio á leik til góða. Lecce er í fallsæti, með 25 stig eftir 28 umferðir.

Chievo 1 - 3 Spezia
1-0 Jacopo Segre ('60)
1-1 Andrey Galabinov ('72)
1-2 Andrey Galabinov ('76, víti)
1-3 Andrey Galabinov ('86)

Sveinn Aron Guðjohnsen var þá ónotaður varamaður í B-deildinni er Spezia lagði Chievo að velli.

Chievo komst yfir í síðari hálfleik en Andrey Galabinov svaraði með þrennu á síðustu tuttugu mínútum leiksins.

Spezia stefnir upp í efstu deild og er í þriðja sæti sem stendur, einu stigi frá öðru sæti sem gefur þátttökurétt í Serie A.