Brendan Rodgers stjóri Leicester segir að það væri gríðarlega svekkjandi fyrir liðið að missa af Meistaradeildinni, sérstaklega eftir að hafa verið með fjórtán stiga forystu á Man Utd í janúar.

Leikurinn gegn Rauðu djöflunum fer fram í dag og er Leicester, sem hefur ekki endað í topp fjórum síðan 2016, án nokkurra lykilmanna. Ben Chilwell og James Maddison eru meiddir á meðan Caglar Soyuncu er í leikbanni.

„Það væri afar svekkjandi að missa af fjórða sætinu. Við vorum í mjög góðri stöðu eftir 20 umferðir en maður verður að halda áfram að gefa í alveg þar til í enda tímabils. Það er margt sem við þurfum að bæta fyrir næstu leiktíð," sagði Rodgers.

„Við misstum af alltof mörgum stigum og þurfum sérstaklega að bæta hugarfarið okkar."

Leicester hefur aðeins fengið níu stig úr átta leikjum eftir Covid hlé.

Jamie Vardy hefur verið í algjöru lykilhlutverki og stefnir hann á gullskóinn, enda markahæstur með 23 mörk á deildartímabilinu.