Brighton tók á móti nýliðum West Bromwich Albion í fyrri leik kvöldsins í enska boltanum.

Jafnræði ríkti með liðunum í byrjun en heimamenn tóku völdin á vellinum er tók að líða á fyrri hálfleik og tóku forystuna á 40. mínútu þegar Jake Livermore var afar óheppinn að skora sjálfsmark. Branislav Ivanovic var að hreinsa hættulegan bolta frá markinu en dúndraði í Livermore og þaðan skaust boltinn inn í markið, ansi klaufalegt hjá tveimur af reynslumestu leikmönnum vallarins.

Gestirnir tóku völdin í síðari hálfleik og komust í nokkur fín færi áður en Karlan Grant gerði jöfnunarmark á 83. mínútu. Grant gerði frábærlega að ná stjórn á knettinum og skjóta honum í netið. Þetta var annar leikur Grant frá komu sinni til West Brom. Hann skoraði 19 mörk fyrir Huddersfield á síðustu leiktíð.

West Brom hélt áfram að sækja eftir jöfnunarmarkið og var ekki alltof langt frá því að gera sigurmark, en lokatölur urðu 1-1.

Brighton er því með fimm stig eftir sex umferðir og West Brom þrjú stig.