Fjallað er um leikmanninn í grein sem BBC birtir í morgun og þar kemur fram að hann hafi byrjað sem miðvörður, svo orðið framherji en þróaðist síðan út í sókndjarfan bakvörð.

„Ég man eftir því þegar þjálfarinn minn sagði mér að ég væri frábær í að klára færi og með hraðann sem vængmaður þarf á að halda," segir Livramento sem ólst upp sem aðdáandi Cristiano Ronaldo enda með portúgalskar rætur í föðurætt.

Livramento ákvað það í samráði við föður sinn að það væri best fyrir sig að yfirgefa Chelsea. Það var ekki auðveld ákvörðun enda hefur hann verið stuðningsmaður Chelsea alla tíð og verið hjá félaginu frá sjö ára aldri.

Brighton, AC Milan og Mónakó höfðu áhuga á Livramento en eftir fund með Hasenhuttl varð Southampton fyrir valinu. Hjá Dýrlingunum hefur leikmaðurinn blómstrað, verið öruggur varnarlega og hættulegur sóknarlega.

Spennandi verður að sjá Livramento, sem hefur verið líkt við ungan Gareth Bale, mæta stórliði Liverpool á morgun.