Harry Kane skein skært er Tottenham valtaði yfir Southampton í fyrsta leik dagsins í enska boltanum.

Kane var ekki lengi að skora sitt 37. mark á árinu og bæta þar með markamet Alan Shearer. Kane skoraði með skalla eftir aukaspyrnu Christian Eriksen.

Kane tvöfaldaði forystuna og tók framúr Lionel Messi yfir mörk skoruð á árinu og var staðan 2-0 í hálfleik.

Dele Alli og Son Heung-min lögðu upp fyrir hvorn annan og innsigluðu sigur heimamanna í byrjun síðari hálfleiks.

Sofiane Boufal klóraði í bakkann en Kane fullkomnaði þrennuna skömmu síðar.

Dusan Tadic gerði annað mark fyrir Southampton undir lokin, en hægt er að setja spurningarmerki við Hugo Lloris í báðum mörkum gestanna.