Chelsea hefði komist upp í 2. sæti með sigri en liðið lenti þremur mörkum undir á Emirates. Tammy Abraham minnkaði muninn á lokakaflanum og steig Jorginho á vítapunktinn í uppbótartíma en spyrnan léleg. Mark þar hefði heldur betur hleypt lífi í lokamínúturnar.

„Við vorum virkilega lélegir í dag, það vantaði orku og sigurvilja í liðið. Við vorum vel skipulagðir en hausarnir voru ekki á réttum stað. Á öðrum degi hefðum við skorað úr vítaspyrnunni og náð í stig en það var ekki raunin í dag," sagði Lampard, sem segist þurfa meiri tíma með liðið.

„Liðin sem eru að vinna á fullu í dag voru ekki að gera það fyrir tveimur eða þremur árum. Við erum ekki komnir á þann stað, ég fann fyrir því þegar það gekk vel og ég finn fyrir því núna þegar gengur ekki jafn vel. Við vorum lélegir í dag og áttum skilið að tapa.

„Við þurfum allir að taka ábyrgð á þessu tapi, bæði ég og leikmennirnir. Við getum ekki leyft okkur að spila á 60-70% getu gegn úrvalsdeildarliði."