Djurgården mætti Umeå í úrslitaleik um toppsæti riðils 4 í sænska bikarnum sem fer fram á undirbúningstímabilinu.

Varnarjaxlinn Guðrún Arnardóttir er lykilmaður hjá Djurgården og var að sjálfsögðu í byrjunarliðinu í dag.

Umeå tók forystuna snemma leiks en Guðrún jafnaði í upphafi síðari hálfleiks. Djurgården tók svo forystuna en gestirnir náðu að jafna á lokakaflanum og hart var barist á síðustu mínútum leiksins.

Djurgården nægði jafntefli til að vinna riðilinn á markatölu en Alexandra Sandström náði að gera sigurmark fyrir Umeå í uppbótartíma.

Djurgården er því úr leik í bikarnum með sex stig eftir þrjár umferðir. Aðeins eitt lið fer upp úr hverjum riðli.