Krónprinsinn Mohammad Bin Salman og fjárfestingahópur hans ætla sér stóra hluti með Newcastle United í sumar en félagið er komið í baráttuna um brasilíska sóknartengiliðinn Philippe Coutinho. Þetta kemur fram í spænska miðlinum Mundo Deportivo.
Bin Salman er nálægt því að ganga frá kaupum á Newcastle og ætlar hann að styrkja leikmannahópinn duglega á næstu árum.
Mörg stór nöfn hafa verið orðuð við félagið en þar má nefna leikmenn á borð við Kalidou Koulibaly, Edinson Cavani og þá er Nabil Fekir einnig á ratsjánni.
Samkvæmt Mundo Deportivo er Newcastle tilbúið að kaupa Coutinho frá Barcelona á 110 milljón punda í sumar en hann yrði stærstu kaup félagsins og yrði liðið byggt í kringum hann.
Arsenal og Chelsea hafa einnig sýnt þessum fyrrum leikmanni Liverpool áhuga en hann er um þessar mundir á láni hjá þýska félaginu Bayern München.
Liverpool hefur þegar sagt leikmanninum að það hafi ekki áhuga á að fá hann aftur.
Athugasemdir