Drinkwater var keyptur til Chelsea árið 2017, ári eftir að hann hjálpaði Leicester að vinna ensku úrvalsdeildina. Hann náði engan veginn að fylgja eftir góðri frammistöðu með Leicester eftir að hann skipti yfir.

Miðjumaðurinn spilaði bara tólf deildarleiki á fimm árum hjá Chelsea, en á síðustu leiktíð var hann á láni hjá Reading í næst efstu deild.

„Fótbolti er frábær íþrótt en þetta var ákvörðun sem var röng fyrir báða aðila," skrifaði Drinkwater í færslu á Instagram. „Ég vil biðja stuðningsfólk Chelsea afsökunar á því hvernig þetta fór; ég hefði elskað ef þið hefðuð séð mig í mínu besta formi í þessari treyju."

Drinkwater var ekki góður innan vallar og ekki gekk betur hjá honum utan vallar þar sem hann var meðal annars handtekinn fyrir ölvunarakstur á sínum tíma.

Drinkwater, sem er 32 ára, mun núna reyna að finna sér nýtt félag. Það er ólíklegt að eitthvað félag í ensku úrvalsdeildinni muni semja við hann.