Arnór Gauti Ragnarsson var á skotskónum er Hönefoss vann 4-1 sigur á Toten í norsku fimmtu deildinni í dag og þá lagði Jónatan Ingi Jónsson upp mark fyrir Sogndal í 5-2 tapi fyrir Fredrikstad.
Arnór Gauti gekk til liðs við Hönefoss fyrir tímabilið og var iðinn við markaskorun í byrjun leiktíðar en hafði ekki skorað deildarmark í tvo mánuði fram að leiknum í dag.
Hann kom Hönefoss á bragðið í leiknum sem endaði 4-1 fyrir liðið en það situr í 8. sæti deildarinnar með 25 stig.
Birkir Þór Guðmundsson spilaði allan leikinn fyrir Volda í sömu deild sem tapaði fyrir Brumunddal, 4-0. Volda er í 9. sæti með 20 stig.
Jónatan Ingi Jónsson lagði upp fyrsta mark Sogndal í 5-2 tapi fyrir Fredrikstad í norsku B-deildinni. Jónatan fór af velli á 59. mínútu leiksins. Valdimar Þór Ingimundarson spilaði allan leikinn fyrir Sogndal.
Alfons Sampsted spilaði allan leikinn fyrir Bodö/Glimt sem vann 2-0 sigur á Jerv í norsku úrvalsdeildinni, Bodö er í 2. sæti með 41 stig, fjórum stigum á eftir Molde.
Birkir í sigurliði
Birkir Bjarnason var í byrjunarliði Adana Demirspor sem lagði Umraniyespor að velli, 1-0. Birkir fór útaf á 60. mínútu og þá stóð Rúnar Alex Rúnarsson vaktina í marki Alanyaspor sem tapaði fyrir Istanbulspor, 1-0.
Elías Már Ómarsson kom inná sem varamaður á 73. mínútu í 1-0 sigri NImes á Laval í frönsku B-deildinni og þá var Jón Dagur Þorsteinsson í byrjunarliði Leuven sem vann Oostende, 2-1, í Belgíu.
Jón Dagur fór af velli á 81. mínútu leiksins.
Athugasemdir