„Á endanum var þetta sanngjarnt jafntefli fannst mér," sagði Þorlákur Árnason, Láki, þjálfari Þórs eftir markalaust jafntefli gegn Aftureldingu á Akureyri í dag.
Lestu um leikinn: Þór 0 - 0 Afturelding
„Fyrri hálfleikur var þokkalega opinn, við fengum rosalega góðar opnanir til þess að gera betur og klára skyndisóknir en svo náði Afturelding að leysa það hjá sér í seinni hálfleik og hann var mjög lokaður og örugglega frekar leiðinlegur," sagði Láki.
Það leit út fyrir að liðin hafi verið að spila uppá jafnteflið í síðari hálfleik.
„Afturelding er búið að vera eitt besta liðið í seinni umferðinni og fengu inn tvo mjög sterka leikmenn, einn Belga og einn Spánverja. Við erum búnir að spila vel í seinni umferðinni, mér fannst þetta bara tvö góð lið. Það voru gæði í fyrri hálfleiknum en á endanum var eins og hvorugt liðið vildi tapa leiknum,"
Láki var svekktur að liðið hafi ekki skorað nokkur mörk í fyrri hálfleik.
„Bjarni fékk besta færi leiksins, einn á móti markmanni og enginn nálægt honum. Afturelding fékk 2-3 góð færi þar sem Aron markvörðu gerði vel. Ég var svekktastur yfir því að ná ekki að klára skyndisóknirnar í fyrri hálfleik, þeir voru galopnir í fyrri," sagði Láki.
