Afturelding skellti sér til Akureyrar í dag og lék gegn Þór á SaltPay vellinum í Lengjudeildinni í dag. Leikurinn var ekki mikið fyrir augað og Magnús Már Einarsson, Maggi, þjálfari gestanna segir að áhorfendur hafi verið sviknir.
Lestu um leikinn: Þór 0 - 0 Afturelding
„Sanngjarnt stig. Þetta var leikur fárra tækifæra, það vantaði uppá síðustu sendinguna og aðeins meiri ákveðni í boxinu til að við hefðum getað skorað. Það var voðalega rólegt yfir þessu í dag, ég held að áhorfendur hafi verið sviknir, þeir fengu ekki góðan leik," sagði Maggi.
„Ég ætlaði bara að vinna, það er svona í grunninn það sem við ætluðum að gera," sagði Maggi og glotti.
Maggi var ánægður með varnarleikinn en sóknarleikurinn útúr karakter hjá Aftureldingu í dag.
„Mér fannst við fínir varnarlega, Þór skapar sér ekki mikið af færum og við höldum hreinu annan leikinn í röð sem er gott en það vantaði meiri ákveðni sóknarlega."
„Þetta var útúr karakter hjá okkur, við höfum verið að skora mikið af mörkum sérstaklega á útivelli í sumar," sagði Maggi.