Franska stórliðið Paris Saint-Germain vann frábæran 4-0 sigur á Marseille í frönsku deildinni í kvöld. Mauro Icardi og Kylian Mbappe skoruðu báðir tvö mörk.
Icardi, sem er á láni frá Inter, skoraði fyrstu tvö mörk leiksins en hann hefur verið heitur og er kominn með 7 mörk í öllum keppnum á tímabilinu.
Kylian Mbappe tók við keflinu í leiknum og skoraði tvö mörk áður en fyrri hálfleikur var búinn. Hann er með 8 mörk í öllum keppnum á tímabilinu.
Angel Di Maria lagði upp tvö mörk og hefur verið langbesti leikmaður PSG á tímabilinu. Hann er með 7 mörk og 8 stoðsendingar í fyrstu fimmtán leikjunum.
PSG er á toppnum með 27 stig og ætlar að stinga af í deildinni líkt og síðustu ár en næsta lið er með 19 stig.
Athugasemdir