Belgíski landsliðsmaðurinn hefur ekki spilað stóra rullu í byrjun tímabilsins hjá spænska stórveldinu.

Hinn þrítugi Hazard hefur ekkert getað eftir að Real Madrid keypti hann frá Chelsea fyrir tveimur árum fyrir upphæð sem gæti farið upp í 146 milljónir evra. Hazard var stórstjarna hjá Chelsea en hefur engan veginn fylgt því eftir í Madríd.

Meiðsli hafa sett strik í reikninginn hjá Hazard síðustu tvö árin, en þau eru ekki að gera það núna.

„Hann er tilbúinn að spila, en vandamálið er að þjálfarinn vill frekar nota aðra leikmenn," sagði Carlo Ancelotti, þjálfari Real Madrid, þegar hann var spurður út í Hazard.

Ancelotti kveðst enn hafa trú á Hazard, en akkúrat núna eru aðrir leikmenn framar í goggunarröðinni. Brasilíski kantmaðurinn Vinicius hefur til að mynda verið að spila mjög vel á þessari leiktíð.