Viktoría, sem er 22 ára gömul, hefur spilað síðustu tvö tímabil með Grindavík og verið með bestu leikmönnum liðsins.

Hún á að baki 38 leiki og 2 mörk í deild- og bikar með Grindavík en hún tók fram skóna á nýju á síðasta ári og hefur nú ákveðið að framlengja samning sinn um tvö ár.

„Viktoría Sól stóð sig mjög vel hjá Grindavík á síðustu leiktíð og það eru frábær tíðindi að hún ætli að taka slaginn með okkur áfram," segir Steinberg Reynisson, formaður meistaraflokksráðs kvenna hjá Grindavík.

„Við finnum mikinn meðbyr með kvennafótboltanum í Grindavík og það verður frábært að hafa Viktoríu með okkur frá fyrsta degi á næsta keppnistímabili. Ég trúi því að hún eigi eftir að verða lykilleikmaður hjá Grindavík á næstu leiktíð."

Grindavík hafnaði í 7. sæti Lengjudeildarinnar með 20 stig á nýafstöðnu tímabili.