Patrick Cutrone, nítján ára U21-landsliðsmaður Ítalíu, var hetja AC Milan sem vann 1-0 sigur gegn Inter í framlengdum leik í 8-liða úrslitum ítalska bikarsins. Cutrone kom inn sem varamaður og skoraði sigurmarkið í framlengingu.

AC Milan mun því mæta Lazio í undanúrslitum í tveggja leikja einvígi sem fram fer í janúar og febrúar.

Gianluigi Donnarumma, markvörður AC Milan, er meiddur og því var bróðir hans í markinu, hinn 27 ára Antonio Donnarumma sem lék sinn fyrsta aðalliðsleik fyrir AC Milan.

Joao Mario, Suso, Ivan Perisic og Jack Bonaventura komust allir nálægt því að skora í venjulegum leiktíma en tókst ekki og því þurfti að grípa til framlengingar.

AC Milan, sem hefur átt erfitt tímabil í Seríu A, var klárlega betra liðið í framlengingunni og Cutrone fagnaði innilega þegar hann skoraði. Hann reif sig úr treyjunni og fékk fyrir það gult spjald.

Tveir leikir eru eftir í 8-liða úrslitum. Napoli mætir Atalanta 2. janúar og daginn eftir er áhugaverður grannaslagur Juventus og Torino.