Íslenski landsliðsmaðurinn Ragnar Sigurðsson er í viðræum við Trabzonspor í tyrknesku úrvalsdeildinni. Tyrkneska dagsblaðið Takvim segir frá þessu en Íslendingavaktin greindi fyrst frá á Íslandi.
Hinn 33 ára gamli Ragnar rifti samningi sínum við rússneska úrvalsdeildarliðið Rostov í þessari viku og getur því samið við nýtt félag í janúar.
Ragnar kom til Rostov frá Fulham árið 2018 og lék 53 leiki með rússneska liðinu og var fyrirliði þess á þessari leiktíð.
Viðræðum Ragnars og Trabzonspor miðar vel áfram samkvæmt Takvim, en um er að ræða eins árs samning með möguleika á framlengingu um eitt ár.
Trabzonspor er í 3. sæti í Tyrklandi, fimm stigum á eftir toppliði Sivasspor. Á meðal leikmanna félagsins er nígeríski miðjumaðurinn John Obi Mikel.
Ragnar hefur skorað fimm mörk í 94 landsleikjum með Íslandi en tvö af þessum mörkum komu gegn Tyrkjum í sumar.
Athugasemdir