West Ham tók á móti Brighton í öðrum leik dagsins í ensku úrvalsdeildinni og voru gestirnir mun betri í fyrri hálfleik.

Leikmenn Brighton virkuðu sprækari og verðskulduðu að komast yfir þegar Neal Maupay kom knettinum í netið rétt fyrir leikhlé.

Hamrarnir mættu grimmari til leiks í síðari hálfleik og voru betri. Yfirburðirnir skiluðu sér þegar Ben Johnson jafnaði með laglegu skoti eftir góðan undirbúning frá Manuel Lanzini.

Tíu mínútum síðar voru gestirnir frá Brighton komnir yfir á nýjan leik þegar Lewis Dunk skoraði eftir hornspyrnu. Það leið þó ekki á löngu þar til Tomas Soucek jafnaði á nýjan leik, eftir aðra hornspyrnu.

Meira var ekki skorað og niðurstaðan nokkuð sanngjarnt 2-2 jafntefli. Hamrarnir eru um miðja deild með 22 stig eftir 15 umferðir. Brighton er með 13 stig.