Domenech gerði garðinn frægan sem þjálfari Lyon frá 1988 til 1993 en eftir það tók hann við U21 landsliði Frakka í rúman áratug. Hann stóð sig vel þar og tók við franska A-landsliðinu í kjölfarið, þar sem hann var við stjórnvölinn frá 2004 til 2010.

Domenech hefur síðan þá þjálfað áhugamannalandslið Bretaníu héraðsins, sem er staðsett í vestasta hluta Frakklands.

Domenech hrökklaðist úr starfi sínu sem landsliðsþjálfari Frakka með skömm eftir skelfilegan árangur á EM 2008 og HM 2010. Hann stýrði Frökkum þó alla leið í úrslit á HM 2006.

Domenech býr yfir mikilli reynslu úr knattspyrnuheiminum eftir að hafa leikið meðal annars fyrir Lyon, PSG og franska landsliðið á ferli sínum sem atvinnumaður.

Nantes er í fallbaráttu frönsku deildarinnar, með 15 stig eftir 17 umferðir.

Til gamans má geta að Domenech hefur ekki stýrt félagsliði í 27 ár.