Eysteinn Húni Hauksson þjálfari Keflvíkinga var ánægður með frammistöðu sinna manna og telur reynslumun liðanna hafa ráðið úrslitum.

„Við vorum að spila við lið með reynslumikla leikmenn og það er aðalmunurinn á milli liðanna, þessi litlu trikk sem reynslumennirnir hafa og við erum að reyna að koma inn hjá okkar mönnum," sagði Eysteinn að leikslokum.

„Við erum að vinna í að byggja rútínerað lið og förum yfir grunnatriðin aftur og aftur. Þau verða að vera á hreinu áður en menn fara í eitthvað dýpra."

Eysteinn er með ungt lið í höndunum og ætlar að styrkja hópinn fyrir komandi tímabil. Hann lofar því þó að uppaldir leikmenn muni fá sín tækifæri.

„Þeir fá klárlega sénsinn. Sumir munu grípa hann, sumir ekki. Við munum styrkja liðið eitthvað og reyna að hafa þar leikmenn sem koma með reynslu inn og gera ungu leikmennina betri."