Rodolfo Borrell fékk meiri ábyrgð frá Guardiola eftir að Arteta hvarf á braut, en Borrell var í þjálfarateyminu ásamt Arteta.

Nýr aðstoðarþjálfari kemur hins vegar til með að verða ráðinn í sumar. Domenec Torrent kemur til greina, en hann er fyrrum aðstoðarstjóri Guardiola hjá Man City. Hann yfirgaf City til að taka við systurfélaginu í New York árið 2018. Hann hætti þar í fyrra, en þó er talið að hann vilji áfram starfa sem aðalþjálfari.

Svo er möguleikinn að Guardiola fari eftir sömu uppskrift og með Arteta, að hann ráði einstakling sem er tiltölulega hættur í fótbolta og vill læra af einum þeim besta.

Xabi Alonso passar inn í það form. Alonso var hæfileikaríkur miðjumaður sem lagði skóna á hilluna árið 2017 eftir að hafa spilað undir stjórn Guardiola hjá Bayern München. Alonso er þessa stundina að þjálfa varalið Real Sociedad.

Aðrir leikmenn sem hafa spilað undir stjórn Guardiola og gætu komið til greina eru Andres Iniesta og David Silva, en hlutverkið gæti komið of snemma fyrir þá þar sem þeir eru enn að spila.

Að vera aðstoðarþjálfari Guardiola hlýtur að vera eftirsóknarvert; starf sem leiðir til stærri hluta.