Buffon, sem er talinn einn besti markvörður allra tíma, hóf ferilinn hjá Parma og spilaði 220 leiki fyrir félagið á sex árum áður en hann var seldur til Juventus fyrir metfé árið 2001.

Hann spilaði í sautján ár hjá Juventus en fór á vit ævintýranna árið 2018 og samdi við Paris Saint-Germain í eitt ár. Eftir það snéri hann aftur til Juventus en hann fer frá félaginu í sumar.

Buffon hefur þegar tilkynnt að hann muni aðeins spila fyrir tvö félög á Ítalíu, Juventus og Parma, en það síðarnefnda hefur sett sig í samband við hann.

Parma vill að Buffon hjálpi liðinu að komast aftur upp í Seríu A en liðið féll úr deildinni á þessu tímabili og er nú Enzo Maresca tekinn við liðinu eftir að hafa þjálfað yngri lið Manchester City.