Inter og Napoli áttust við í hörkuleik í ítalska boltanum í kvöld þar sem heimamenn höfðu betur á San Siro.

Leikurinn var afar jafn þar sem bæði lið fengu góð færi til að skora en nýting heimamanna var mun betri en hjá gestunum.

Danilo D'Ambrosio skoraði fyrsta mark leiksins með góðu skoti eftir lága fyrirgjöf frá Cristiano Biraghi.

Napoli komst nálægt því að jafna en inn vildi boltinn ekki og tvöfaldaði Lautaro Martinez forystuna á 74. mínútu.

Meira var ekki skorað og 2-0 sigur Inter staðreynd. Romelu Lukaku og Alexis Sanchez voru í byrjunarliði Inter á meðan Ashley Young, Victor Moses og Christian Eriksen komu inn af bekknum á lokakaflanum.

Inter er í öðru sæti eftir sigurinn, einu stigi fyrir ofan Atalanta. Bæði lið eru örugg með Meistaradeildarsæti og geta ekki náð toppliði Juventus sem er búið að vinna deildina enn eina ferðina.

Napoli er áfram í sjöunda sæti og er þegar öruggt með sæti í Evrópudeildinni eftir sigur gegn Juve í úrslitaleik ítalska bikarsins.