Þremur leikjum er lokið í Lengjudeild kvenna í dag og er Keflavík komið á toppinn eftir sigur gegn Víkingi R.

Staðan var markalaus þar til á 43. mínútu þegar Paula Watnick skoraði verðskuldað opnunarmark. Tveimur mínútum síðar lagði Paula annað mark leiksins óvart upp fyrir Ísabel Jasmín Almarsdóttur. Paula hitti knöttinn illa en hann barst til Ísabel sem smellhitti.

Rut Kristjánsdóttir var lífleg í liði gestanna og minnkaði muninn á 57. mínútu með laglegu skoti sem fór í stöngina og inn.

Keflavík hélt áfram að stjórna leiknum þar til á lokakaflanum. Um leið og Víkingskonur gerðu sig líklegar til að jafna var þeim refsað af Anítu Lind Daníelsdóttur, sem skoraði glæsilegt mark eftir frábæran undirbúning frá fyrirliðanum Natasha Moraa Anasi.

Kara Petra Aradóttir bætti svo fjórða marki Keflavíkur við með sinni fyrstu snertingu eftir að hafa komið inn af bekknum. Skot hennar hafði viðkomu í varnarmanni Víkings og breytti um stefnu sem gerði Höllu Margréti Hinriksdóttur erfitt fyrir á milli stanganna.

Meira var ekki skorað og er Keflavík með 17 stig eftir 7 umferðir, einu stigi fyrir ofan Tindastól og þremur fyrir ofan Gróttu. Víkingur er með 7 stig.

Haukar 2 - 0 Tindastóll
1-0 Vienna Behnke ('32)
2-0 Vienna Behnke ('55)

Fjölnir 1 - 1 ÍA
1-0 Sara Montoro ('10)
1-1 Jaclyn Ashley Poucel ('90)

Haukar höfðu þá betur gegn Tindastóli í hörkuleik. Þetta reyndist fyrsta tap Tindastóls á deildartímabilinu og er liðið því búið að missa toppsætið til Keflavíkur.

Haukar unnu 2-0 gegn Sauðkræklingum og skoraði Vienna Behnke bæði mörk Hafnfirðinga. Haukar eru í fjórða sæti með ellefu stig eftir sigurinn. Tindastóll er í öðru sæti með sextán stig.

Fjölnir náði þá í stig gegn ÍA eftir að hafa leitt stærstan hluta leiksins. Skagakonur jöfnuðu undir lokin.

Þetta var aðeins fjórða stig Fjölnis á tímabilinu en sjöunda stig ÍA.

Það getur tekið tíma fyrir stöðutöfluna að uppfærast.