Framherjinn Telma Hjaltalín Þrastardóttir hefur framlengt samning sinn við Stjörnuna út tímabilið 2021.
Hin 23 ára gamla Telma sleit krossband í þriðja skipti á ferlinum undir lok sumars 2018.
„Hún hefur að undanförnu verið að jafna sig eftir meiðsli en endurhæfingin hefur gengið vel og stefnir í að hún verði komin inn á völlinn innan skamms," segir í yfirlýsingu frá Stjörnunni.
Telma hefur skorað tíu mörk í þrettán leikjum með Stjörnunni en hún lék áður með Aftureldingu, Val og Breiðabliki.
Telma hefur skorað 52 mörk í 88 leikjum í efstu deild á ferlinum en hún hafði verið valin í A-landsliðið í fyrsta skipti áður en hún sleit krossband árið 2018.
Athugasemdir