Hazard fór á velli eftir tæklingu frá landa sínum, Thomas Meunier. Zinedine Zidane, stjóri Real, sagði eftir leikinn í gær að Hazard finndi til og talaði um snúinn ökkla.

Ökkla meiðsli hafa hrjáð Mo Salah, leikmann Liverpool, undanfarið og því höfðu Madridingar áhyggjur af því að Hazard væri að fara í gegnum svipaða tíma, þar sem Salah hefur lítið æft með liðinu en þó spilað langflesta leiki.

„Eftir prófanir sjúkraliðsins á Hazard þá hefur komið í ljós að leikmaðurinn er einungis marinn á hægri fæti," segir á heimasíðu Real Madrid.

Real Madrid mætir Barcelona í El Clasico þann 18. desember. Liðin eru jöfn að stigum á þessum tímapunkti og allar líkur eru á því að Hazard verði orðinn klár allavega viku fyrir þann leik.