Spænska stórveldið Barcelona er búið að bjóða Shane Kluivert, yngsta syni Patrick Kluivert, þriggja ára samning.
Shane, sem leikur sem kantmaður, er nýlega orðinn 18 ára gamall og er mikilvægur hlekkur í B-liði Barcelona.
Hann er með tilboð frá Barca á borðinu en ekki er ljóst hvort hann ætli að skrifa undir eða halda á önnur mið þar sem hann sér greiðari leið inn í aðalliðið.
Shane er með 8 leiki að baki fyrir yngri landslið Hollands og á framtíðina fyrir sér.
Eldri bræður hans spila einnig fótbolta, þar sem Ruben Kluivert er á mála hjá Lyon og Justin Kluivert hjá Bournemouth.
Patrick Kluivert, faðir þeirra, gerði garðinn frægan með Barcelona og hollenska landsliðinu á tíð sinni sem atvinnumaður í fótbolta.
Athugasemdir
